(B) ပၢင်တၢၼ်ႈၶႆႈၶွၼ်ႇၾရႅၼ်ႉ လုၵ်ႈႁဵၼ်း SSBU ပွၵ်ႈၵမ်း (1)

Description

မၢႆတွင်း ဝိၸႃတမင်ႇၵလႃႇဝၼ်းၵိူတ်ႇ ၸဝ်ႈၶူးလူင် Prof. Dr. ၶမ်းမၢႆ ꩪမ်မသႃမိ ၽူႈၵေႃႇတင်ႈ လႄႈ ဢထိပတိၸၼ်ႉၸွမ်ပုတ်ႉထမိူင်းတႆး ဢႃႇယုထူၼ်ႈထိုင် 60 ပီ ဝဵင်းတူၼ်ႈတီး၊ မိူင်းႁူမ်ႈတုမ်ႇမျၢၼ်ႇမႃႇ

ပေႃးထိုင်မႃး ဝၼ်းထိ(06/11/2024)ၼႆႉ တေမီး “ပၢင်တၢၼ်ႈၶႆႈၶွၼ်ႇၾရႅၼ်ႉ လုၵ်ႈႁဵၼ်း ၸၼ်ႉၸွမ်ပုတ်ႉထမိူင်းတႆး(SSBU)ပွၵ်ႈၵမ်း(1)”သေ ႁဵတ်းပဵၼ်တီႈမၢႆတွင်း ပၢင်ႁူမ်ၸူမ်း ဝၼ်းၵိူတ်ႇ ၸဝ်ႈၶူးမေႃလူင် Prof. Dr. ၶမ်းမၢႆ ꩪမ်မသႃမိ ၵေႃႉပဵၼ်ၽူႈၵေႃႉတင်ႈလႄႈ ဢထိပတိ ၸၼ်ႉၸွမ်ပုတ်ႉထမိူင်းတႆး ဢႃႇယုထူၼ်ႈထိုင်(60)ပီ တီႈဝဵင်းတူၼ်ႈတီး၊ မိူင်းႁူမ်ႈ တုမ်ႇမျၢၼ်ႇမႃႇ။ ပၢင်တၢၼ်ႈၶႆႈၶွၼ်ႇၾရႅၼ်ႉလုၵ်ႈႁဵၼ်းၼႆႉ ပဵၼ်ပွၵ်ႈႁႅၵ်ႈဢွၼ်တၢင်းသုတ်း ဢၼ်လုၵ်ႈႁဵၼ်းၸၼ်ႉၸွမ်ပုတ်ႉထမိူင်းတႆး ဢွၼ်ၵၼ်ႁူမ်ႈၵၼ်သေၸတ်းႁဵတ်း။ ယဝ်ႉၵေႃႈ ပၢင်ၼႆႉ တေမီးလွင်ႈတၢင်ႇၼႄ "လိၵ်ႈပွင်၊ ၶူင်းၵၢၼ်လဵပ်ႈႁဵၼ်းလွတ်ႈလႅဝ်း ဢမ်ႇၼၼ် ၽိုၼ်လိၵ်ႈၽွင်းမိူဝ်ႈလဵပ်ႈႁဵၼ်း တီႈၸၼ်ႉၸွမ်ပုတ်ႉထမိူင်းတႆး" ၼၼ်ႉယဝ်ႉ။ ၼႂ်းပၢင်တၢၼ်ႈ ၶႆႈၶွၼ်ႇၾရႅၼ်ႉၼၼ်ႉ တေၸႂ်ႉသၢမ်ၽႃႇသႃႇ မိူၼ်ၼင်ႇ ၽႃႇသႃႇတႆး၊ ၽႃႇသႃႇမၢၼ်ႈလႄႈ ဢင်းၵိတ်ႉ ၸိူဝ်းၼႆႉသေ ဢုပ်ႇၶႆႈယဝ်ႉ။